مجنونه فيني وانا فيك مجنون

مقبل عليك بحب وأشواق وشجون
وبداخلي كل الأحاسيس تختال

مجنونه فيني أو أنا فيك مجنون
ماعاد تفرق دامنا خبال فخبال

خل العذارى في هوانا يغنـّون
للصـّبح لين يجرنا الصبح موال

ودي تعرف الناس وشكثر مفتون
باللي هواها يشرح الصدر والحال

يابنت العطاوي ليتني كنت فرعون
وأغرق في حبك وأبقى للحب تمثال

ولا أكون إللي بغيتي لك يكون
مغرم متيم شاعر إلحب خيّال

مهووس حبك؟ لا .. أنا فيك مسكون
جنـّيتك دايم معي فكل الاحوال

لو خيـّروني بينك ومال قارون
لاختارك إنتي مابها شكّ وجدال

دامك تمونين .. إيعقب غيرك يمون
راسي لجل راسك من المتن ينشال

مانيب أحبك رمش وخدود وعيون
حبيتك أخلاق وأحاسيس وأفعال

فكري بناته من غلاتك يفزّون
ماهو بتواضع مير تقدير وإجلال

اهيم وأهديك بشعر حب موزون
وأسعى مابين الحب وإلشعر رحال

أشباه ليلى خلف سورك يصفـّون
والقلب حارس والمعاليق الاقفال

إنتي سحابة شوق تمطرني مزون
وإن جفّ ماها قلت تكفيني ظلال

مالك لوااا .. ما أخون والله ما أخون
عمرك سمعتي الطيش قد خان الاطفال؟؟!!

ولا سمعتي إبليس وابليس ملعون
صام رمضان وزاده بست(6)شوال ؟؟

ماخونك إلا لا غدى القبح مزيون
ولا أشوف الذل بقلوب الأبطال

هذاك وقت ٍ كل شي ٍ به يهون
حتى المشاعر فيه بالصدر تغتال

وشكثر أحبك؟؟ وشكثر؟؟ كثر هالكون؟
مدري ..!! ترى ما شفت للحب مثقال ..

يمكن أحبك ألف ألفين مليون
ولا أحبــكـ موت وأمـوت بالحــال

ماللمحبه عــد ّ أو طــعــم أو لــون
ولاهي قصايد لا سرى الليل تنقال

هي الجواب اللي به الناس يلقون
تفسير فورة دم حرمه ورجال

وأنا أشهد إن دمـّي ودمـّك يفورون
فورة مشاعر جيل من عرض الاجيال

منتي((الجوهرة)) ... إنتي الــدرّ مكـنون
من وسط قاع البحر شفتك على الجال

شفتك يقين يشيل عن متنه ظنون
وذبيتي شالك والحقـه منـي عقــال

وشفت الشفايف عضت لسان وسنون
كنهم يقولون الجفى يالغضي طال

وراودت نفسي لا أضيع ويضيعون
لاني بجيب العيد في نشوة هبال

وصديت صدة يوسف وصحت تكفون
خلوا لنا في صفحة الطهر منزال

وقلتي : أحبك طيـش وأحبك جنون
ورديت : أحبك لكن بعقـــل وخبـال

م///ن

يـــــــــــــــــآآآآآآآآآآآآآآآآآآآآآآآآي مـــــــــــــــره تهبـــــــــــــــل

جــــــــــنــــــــــآآن يالـغــلآ كــل شــي منــك جنـآآن وخقــآآق < متـعوب عليها هع

تقـبلـي مرووري وتفحيـطـآتي هع4

مشكــــــــورة
خيتوو على الطرح المفييد
تسلميين
تقبلي مروري